श्री स्वर्णाकर्षणभैरव मन्त्रमय स्तोत्रम्
ब्रह्मा यस्य ऋषिः स्वयं निगदितश्छन्दो मतं त्रैष्टुभं
स्वर्णाकर्षणभैरवो हरिहरब्रह्मात्मको देवता ।
ह्रीं बीजं भृगुशक्तिरित्यभिहितं तस्यैव सूत्रात्मनः
स्तोत्रं ध्यान पुरःसरं मनुमयं ब्रूमो वयं प्रत्यहम् ॥ १ ॥
मन्दारद्रुममूलपूजितमहामाणिक्यसिंहासने
संविष्टो दरभिन्न चम्पकरुचा देव्या समालिङ्गितः ।
भक्तेभ्यो वररत्न पात्र भरितं स्वर्णं ददानोऽनिशं
स्वर्णाकर्षणभैरवो विजयते स्वर्गापवर्गप्रदः ॥ २ ॥
ओं ऐं क्लां क्लीं क्लूमिति व्याहरन्
यो भक्तः स्वर्णाकर्षणम् ।
कारुण्याब्धिः कल्पमूलाधिवासः
स्वर्णाकर्षो भैरवो मेऽस्तु भूत्यै ॥ ३ ॥
ह्रां ह्रीं हूं सः सन्ततं जापकानां
वर्षन्तं तं स्वर्णवृष्टिं समग्राम् ।
अन्तः स ्वान्तं सूर्यकोटिप्रकाशं
स्वर्णाकर्षं भैरवं भावयामि ॥ ४ ॥
मरकतमणिपात्रे सम्भृतं स्वर्णपूर्णं
कृपणतरजनेभ्यस्तारतः सम्प्रदातुः ।
कुरु हृदय सपर्यां सेवमानाय नित्यं
सुरवरमनुजेन्द्रस्यापदुद्धारणाय ॥ ५ ॥
नमोऽजामलबद्धाय ब्रह्मसूत्राधिवाससे ।
स्वर्णाकर्षणशीलाय साधकानां कृतात्मने ॥ ६ ॥
लोकेश्वराद्यर्चितपादुकाय
दारिद्र्यनिर्मूलनकारणाय ।
स्वर्णादि दानकरणोद्यत भैरवाय
कारुण्यवारान्निधये नमस्ते ॥ ७ ॥
दीनानाथ विपन्नरक्षणपरै राज्यप्रतीक्षापरैः
सिद्धैः साध्यगणैः सुरासुरगणैर्भुक्तिप्रयुक्तात्मभिः ।
मूले कल्पतरोर्महामणिमये मार्तण्डतेजोजुषे
स्वर्णाकर्षणभैरवाय सततं कुर्मो नमस्यां वयम् ॥ ८ ॥
स्वर्णाकर्षिस्वर्णदेव्याश्रिताय
स्वर्णारूढोदारसिंहासनाय ।
कुर्मो नित्यं स्वर्णदात्रे नमस्यां
दारिद्र्यद्वे षि श्रीमते भैरवाय ॥ ९ ॥
स्वर्णप्रदानाध्वरदीक्षिताय
स्वतेजसाक्रान्तजगत्त्रयाय ।
औदार्यसम्पत्सदनाय नित्यं
ओं श्रीमहाभैरव ते नमोऽस्तु ॥ १० ॥
चिन्तामणिस्थितमहानिधिकामधेनु-
-मन्दारमूलमणिमण्डपमध्यगाय ।
स्वर्णप्रदाननिरताय सदा सपर्यां
कुर्मो वयं त्रिकरणैः परभैरवाय ॥ ११ ॥
मूले कल्पतरोः प्रभापरिमले भद्रासने संस्थितो
हस्ताम्भोरुहरत्नपात्रभरितैः कार्तस्वरैर्भास्वरैः ।
निर्मूलीकृतदुर्गतो विरचयन् विद्युद्दिनेशद्युतिः
स्वर्णाकर्षणभैरवो भवतु नो दारिद्र्यविद्वेषणः ॥ १२ ॥
दुग्धाद्याराध्य स्वर्णाकृति कनकमये द्वीपवर्ये सुधाब्धौ
कापित्थे तत्र रम्ये मणिमयविलसद्भित्तिपाश्चात्यभागे ।
यद्वत्तं सर्ववाञ्छाधिकवसुनिचयं मन्त्रिणां संसरन्तं
ध्यायेच्छ्रीभैरवं तं सकलसुवसुदं दुःखदारिद्र्य शत्रुम् ॥ १३ ॥
सुवर्णमण्डपे ध्यायेत् सुवर्णरुचिभिर्युतम् ।
महात्मानं सुखासीनं प्रसन्नवरदायकम् ॥ १४ ॥
सर्वरत्नविभूषाढ्यं सुरासुरनमस्कृतम् ।
मणिहारकसम्पूर्तिं ददतं स्वकरैः सदा ॥ १५ ॥
सुवर्णवृष्टिरूपैश्च धनसारैर्निरन्तरम् ।
दारिद्र्यनामसंहारं कुण्डलोल्लाससम्युतम् ॥ १६ ॥
एवं ध्यात्वा महात्मानं महादारिद्र्यनाशनम् ।
स्तौमि मन्दारमूलस्थं ब्रह्मसूत्राधिवासनम् ॥ १७ ॥
स्वर्णसिद्धिं करैरेव ददानं स्वर्णभैरवम् ।
ऋणं न जायते तस्य धनं शीघ्रमवाप्नुयात् ॥ १८ ॥
स्वर्णादिमध्यमणिमण्डप कल्पवृक्षे
पीतारुणाम्बुजनिविष्टसुवर्णवर्णम् ।
माणिक्यपात्रमभयं दधतं च दोर्भ्यां
स्वर्णादिकर्षणविनोदनिधिं नमामि ॥ १९ ॥
सुवर्णकर्षकं नित्यं ऋणहर्तारमीश्वरम् ।
भजतो न ऋणं तस्य धनं शीघ्रं प्रजायते ॥ २० ॥
पीतवर्णं चतुर्बाहुं त्रिनेत्रं पीतवाससम् ।
अक्षद्वयं स्वर ्णमयं तडित्पूरितपात्रकम् ॥ २१ ॥
अतितीक्ष्णमहाशूलं तोमरं चामरद्वयम् ।
सततं चिन्तयेद्यस्तु भैरवं स्वर्णसिद्धिदम् ॥ २२ ॥
स्वर्णाकर्षणभैरवमन्त्राढ्यं स्तोत्रमुत्तमम् ।
पठतां निधिसिद्धिश्च स्वर्णसिद्धिश्च जायते ॥ २३ ॥
अनेन स्तवराजेन नित्यं ब्रह्महरीश्वराः ।
स्वर्णाकर्षणनामानि स्तुवन्ति जगदीश्वराः ॥ २४ ॥
फलश्रुतिः –
यः पठेत् परमं स्तोत्रमिदं नित्यं नरोत्तमः ।
स मर्त्यो मन्दभाग्योऽपि भैरवस्य प्रसादतः ॥ २५ ॥
इच्छतोऽप्यधिकां लक्ष्मीं लभते नात्र संशयः ।
रससिद्धिर्भवेच्छीघ्रं निधीनामधिपो भवेत् ॥ २६ ॥
सर्वान् कामानवाप्नोति दैवतैरपि दुर्लभम् ।
एतज्जपैर्महालक्ष्मीश्चञ्चलाप्यचला भवेत् ॥ २७ ॥
रत्नान्यश्वान् गजान् भूतीर्लभते शीघ्रमेव हि ।
स्वर्णराशिमवाप्नोति चाक्षयां नात्र संशयः ॥ २८ ॥
धेनुं चिन्तामणिं कल्पद्रुमं शीघ्रमवाप्नुयात् ।
नित्यमष्टोत्तरशतं यो जपेत् स्तोत्रमुत्तमम् ॥ २९ ॥
मण्डलार्धाच्च प्रागेव स्वर्णराशिमनुत्तमम् ।
सततं ध्यायते तस्मै दर्शयत्येव निश्चयः ॥ ३० ॥
नित्यं च त्रिपुराभक्तैः स्वर्णाकर्षणभैरवः ।
यत्नेन सर्वदोपास्यः सर्वकामप्रदायकः ॥ ३१ ॥
इति श्रीरुद्रयामले श्रीत्रिपुरासिद्धान्ते दक्षिणामूर्ति प्रोक्तं श्री स्वर्णाकर्षण भैरव स्तोत्रम् ॥
sri swarnakarshana bhairava mantramaya stotram