श्री बटुकभैरव ब्रह्म कवचम्

श्रीदेव्युवाच ।

भगवन् सर्ववेत्ता त्वं देवानां प्रीतिदायकम् ।

भैरवं कवचं ब्रूहि यदि चास्ति कृपा मयि ॥ १ ॥

प्राणत्यागं करिष्यामि यदि नो कथयिष्यसि ।

सत्यं सत्यं पुनः सत्यं सत्यमेव न संशयः ॥ २ ॥

इत्थं देव्या वचः श्रुत्वा प्रहस्याति स्वयं प्रभुः ।

उवाच वचनं तत्र देवदेवो महेश्वरः ॥ ३ ॥

ईश्वर उवाच ।

बटुककवचं दिव्यं शृणु मत्प्राणवल्लभे ।

चण्डिकातन्त्रसर्वस्वं बटुकस्य विशेषतः ॥ ४ ॥

तत्र मन्त्राद्यक्षरं तु वासुदेवस्वरूपकम् ।

शङ्खवर्णद्वयो ब्रह्मा बटुकं चन्द्रशेखरः ॥ ५ ॥

आपदुद्धारणो देवो भैरवः परिकीर्तितः ।

प्रवक्ष्यामि समासेन चतुर्वर्गप्रसिद्धये ॥ ६ ॥

प्रणवं कामदं विद्याल्लज्जाबीजं च सिद्धिदम् ।

बटुकायेति विज्ञेयं महापातकनाशनम् ॥ ७ ॥

आपदुद्धारणायेति त्वापदुद्धारणं नृणाम् ।

कुरु द्वयं महेशानि मोहने परिकीर्तितम् ॥ ८ ॥

बटुकाय महेशानि स्तम्भने परिकीर्तितम् ।

लज्जाबीजं तथा विद्यान्मुक्तिदं परिकीर्तितम् ।

द्वाविंशत्यक्षरो मन्त्रः क्रमेण जगदीश्वरि ॥ ९ ॥

[* मनुः – ओं ह्रीं बटुकाय आपदुद्धारणाय कुरु कुरु बटुकाय ह्रीम् । *]

अस्य श्रीबटुकभैरवब्रह्मकवचस्य भैरव ऋषिः अनुष्टुप् छन्दः श्रीबटुकभैरवो देवता मम श्रीबटुकभैरवप्रसादसिद्ध्यर्थे जपे विनियोगः ॥

अथ कवचम् ।

ओं पातु शिरसि नित्यं पातु ह्रीं कण्ठदेशके ॥ १० ॥

बटुकाय पातु नाभौ चापदुद्धारणाय च ।

कुरु द्वयं लिङ्गमूले त्वाधारे वटुकाय च ॥ ११ ॥

सर्वदा पातु ह्रीं बीजं बाह्वोर्युगलमेव च ।

षडङ्गसहितो देवो नित्यं रक्षतु भैरवः ॥ १२ ॥

ओं ह्रीं बटुकाय सततं सर्वाङ्गं मम सर्वदा ।

ओं ह्रीं पादौ महाकालः पातु वीरासनो हृदि ॥ १३ ॥

ओं ह्रीं कालः शिरः पातु कण्ठदेशे तु भैरवः ।

गणराट् पातु जिह्वायामष्टभिः शक्तिभिः सह ॥ १४ ॥

दण्डपाणिर्गुह्यमूले भैरवीसहितस्तथा ।

विश्वनाथः सदा पातु सर्वाङ्गं मम सर्वदा ॥ १५ ॥

अन्नपूर्णा सदा पातु चांसौ रक्षतु चण्डिका ।

असिताङ्गः शिरः पातु ललाटं रुरुभैरवः ॥ १६ ॥

चण्डभैरवः पातु वक्त्रं कण्ठं श्रीक्रोधभैरवः ।

उन्मत्तभैरवः पातु हृदयं मम सर्वदा ॥ १७ ॥

नाभिदेशे कपाली च लिङ्गे भीषणभैरवः ।

संहारभैरवः पातु मूलाधारं च सर्वदा ॥ १८ ॥

बाहुयुग्मं सदा पातु भैरवो मम केवलम् ।

हंसबीजं हृदि पातु सोऽहं रक्षतु पादयोः ॥ १९ ॥

प्राणापानौ समानं च उदानं व्यानमेव च ।

रक्षन्तु हारमूले च दशदिक्षु समन्ततः ॥ २० ॥

प्रणवः पातु सर्वाङ्गं लज्जाबीजं महाभये ।

इति श्रीब्रह्मकवचं भैरवस्य प्रकीर्तितम् ॥ २१ ॥

चतुवर्गप्रदं नित्यं स्वयं देवप्रकाशितम् ।

यः पठेच्छृणुयान्नित्यं धारयेत्कवचोत्तमम् ॥ २२ ॥

सदानन्दमयो भूत्वा लभते परमं पदम् ।

य इदं कवचं देवी चिन्तयेन्मन्मुखोदितम् ॥ २३ ॥

कोटिजन्मार्जितं पापं विनश्यति च तत् क्षणात् ।

जलमध्येऽग्निमध्ये वा दुर्ग्रहे शत्रुसङ्कटे ॥ २४ ॥

कवचस्मरणाद्देवि सर्वत्र विजयी भवेत् ।

भक्तियुक्तेन मनसा कवचं पूजयेद्यदि ॥ २५ ॥

कामतुल्यस्तु नारीणां रिपूणां च यमोपमः ।

तस्य पादाम्बुजद्वन्दं राज्ञां मुकुटभूषणम् ॥ २६ ॥

तस्य भूतिं विलोक्यैव कुबेरोऽपि तिरस्कृतः ।

अस्य विज्ञानमात्रेण मन्त्रसिद्धिर्न संशयः ॥ २७ ॥

इदं कवचमज्ञात्वा यो जपेद्बटुकं नरः ।

न चाप्नोति फलं तस्य परं नरकमाप्नुयात् ॥ २८ ॥

मन्वन्तरत्रयं स्थित्वा तिर्यग्योनिषु जायते ।

इहलोके महारोगी दारिद्र्येणातिपीडितः ॥ २९ ॥

शत्रूणां वशगो भूत्वा करपात्री भवेज्जडः ।

देयं पुत्राय शिष्याय शान्ताय प्रियवादिने ॥ ३० ॥

कार्पण्यरहितायालं बटुभक्तिरताय च ।

यः परस्मै प्रदाता वै तस्य तस्यातिसत्वरम् ॥ ३१ ॥

आयुर्विद्या यशो धर्मं बलं चैव न संशयः ।

इति ते कथितं देवि गोपनीयं स्वयोनिवत् ॥ ३२ ॥

इति श्रीरुद्रयामले श्री बटुकभैरव ब्रह्म कवचम् ॥

sri batuka bhairava brahma kavacham