श्री बगलामुखी कवचम् – २ (वैरिनाशकरम्)
श्रीभैरवी उवाच ।
श्रुत्वा च बगलापूजां स्तोत्रं चापि महेश्वर ।
इदानीं श्रोतुमिच्छामि कवचं वद मे प्रभो ॥ १ ॥
वैरिनाशकरं दिव्यं सर्वाऽशुभविनाशनम् ।
शुभदं स्मरणात् पुण्यं त्राहि मां दुःखनाशनम् ॥ २ ॥
श्रीभैरव उवाच ।
कवचं शृणु वक्ष्यामि भैरवि प्राणवल्लभे ।
पठित्वा धारयित्वा तु त्रैलोक्ये विजयी भवेत् ॥ ३ ॥
अस्य श्रीबगलामुखीकवचस्य नारद ऋषिः अनुष्टुप् छन्दः श्रीबगलामुखी देवता ल ं बीजं ईं शक्तिः ऐं कीलकं पुरुषार्थचतुष्टये जपे विनियोगः ॥
अथ कवचम् ।
शिरो मे बगला पातु हृदयमेकाक्षरी परा ।
ओं ह्रीं ओं मे ललाटे च बगला वैरिनाशिनी ॥ ४ ॥
गदाहस्ता सदा पातु मुखं मे मोक्षदायिनी ।
वैरिजिह्वाधरा पातु कण्ठं मे बगलामुखी ॥ ५ ॥
उदरं नाभिदेशं च पातु नित्यं परात्परा ।
परात्परतरा पातु मम गुह्यं सुरेश्वरी ॥ ६ ॥
हस्तौ चैव तथा पातु पार्वती परिपातु मे ।
विवादे विषमे घोरे सङ्ग्रामे रिपुसङ्कटे ॥ ७ ॥
पीताम्बरधरा पातु सर्वाङ्गं शिवनर्तकी ।
श्रीविद्या समयं पातु मातङ्गी पूरिता शिवा ॥ ८ ॥
पातु पुत्रं सुतां चैव कलत्रं कालिका मम ।
पातु नित्यं भ्रातरं मे पितरं शूलिनी सदा ॥ ९ ॥
इदं हि बगलादेव्याः कवचं मन्मुखोदितम् ।
न वै देयममुख्याय सर्वसिद्धिप्रदायकम् ॥ १० ॥
पठनाद्धारणादस्य पूजनाद्वाञ्छितं लभेत् ।
इदं कवचमज्ञात्वा यो जपेद्बगलामुखीम् ॥ ११ ॥
पिबन्ति शोणितं तस्य योगिन्यः प्राप्य सादराः ।
वश्ये चाकर्षणे चैव मारणे मोहने तथा ॥ १२ ॥
महाभये विपत्तौ च पठेद्वा पाठयेत् तु यः ।
तस्य सर्वार्थसिद्धिः स्याद्भक्तियुक्तस्य पार्वती ॥ १३ ॥
इति श्रीरुद्रयामले वैरिनाशकर श्री बगलामुखी कवचम् ॥
sri bagalamukhi kavacham 2 vairinashakaram