श्री बाला मानसपूजा स्तोत्रम्

उद्यद्भानुसहस्रकान्तिमरुणक्षौमाम्बरालङ्कृतां

गन्धालिप्तपयोधरां जपवटीं विद्यामभीतिं वरम् ।

हस्ताब्जैर्दधतीं त्रिणेत्रविलसद्वक्त्रारविन्दश्रियं

देवीं बद्धहिमांशुरत्नमकुटां वन्देऽरविन्दस्थिताम् ॥ १ ॥

एणधराश्मकृतोन्नतधिष्ण्यं

हेमविनिर्मितपादमनोज्ञम् ।

शोणशिलाफलकं च विशालं

देवि सुखासनमद्य ददामि ॥ २ ॥

ईशमनोहररूपविलासे

शीतलचन्दनकुङ्कुममिश्रम् ।

हृद्यसुवर्णघटे परिपूर्णं

पाद्यमिदं त्रिपुरेशि गृहाण ॥ ३ ॥

लब्धभवत्करुणोऽहमिदानीं

रक्तसुमाक्षतयुक्तमनर्घम् ।

रुक्मविनिर्मितपात्रविशेषे-

-ष्वर्घ्यमिदं त्रिपुरेशि गृहाण ॥ ४ ॥

ह्रीमिति मन्त्रजपेन सुगम्ये

हेमलतोज्ज्वलदिव्यशरीरे ।

योगिमनः समशीतजलेन

ह्याचमनं त्रिपुरेऽद्य विधेहि ॥ ५ ॥

हस्तलसत्कटकादि सुभूषाः

आदरतोऽम्ब वरोप्य निधाय ।

चन्दनवासितमन्त्रिततोयैः

स्नानमयि त्रिपुरेशि विधेहि ॥ ६ ॥

सञ्चितमम्ब मया ह्यतिमूल्यं

कुङ्कुमशोणमतीव मृदु त्वम् ।

शङ्करतुङ्गतराङ्कनिवासे

वस्त्रयुगं त्रिपुरे परिधेहि ॥ ७ ॥

कन्दलदंशुकिरीटमनर्घं

कङ्कणकुण्डलनूपुरहारम् ।

अङ्गदमङ्गुलिभूषणमम्ब

स्वीकुरु देवि पुराधिनिवासे ॥ ८ ॥

हस्तलसद्वरभीतिहमुद्रे

शस्ततरं मृगनाभिसमेतम् ।

सद्घनसारसुकुङ्कुममिश्रं

चन्दनपङ्कमिदं च गृहाण ॥ ९ ॥

लब्धविकासकदम्बकजाती-

-चम्पकपङ्कजकेतकयुक्तैः ।

पुष्यचयैर्मनसामुचितैस्त्वां

अम्ब पुरेशि भवानि भजामि ॥ १० ॥

ह्रीं‍पदशोभिमहामनुरूपे

धूरसि मन्त्रवरेण मनोज्ञम् ।

अष्टसुगन्धरजःकृतमाद्ये

धूपमिमं त्रिपुरेशि ददामि ॥ ११ ॥

सन्तमसापहमुज्ज्वलपात्रे

गव्यघृतैः परिवर्धितदेहम् ।

चम्पककुड्मलवृन्तसमानं

दीपगणं त्रिपुरेऽद्य गृहाण ॥ १२ ॥

कल्पितमद्य धियाऽमृतकल्पं

दुग्धसितायुतमन्नविशेषम् ।

माषविनिर्मितपूपसहस्रं

स्वीकुरु देवि निवेदनमाद्ये ॥ १३ ॥

लङ्घितकेतकवर्णविशेषैः

शोधितकोमलनागदलैश्च ।

मौक्तिकचूर्णयुतैः क्रमुकाद्यैः

पूर्णतराम्ब पुरस्तव पात्री ॥ १४ ॥

ह्रीं‍त्रयपूरितमन्त्रविशेषं

पञ्चदशीमपि षोडशरूपम् ।

सञ्चितपापहरं च जपित्वा

मन्त्रसुमाञ्जलिमम्ब ददामि ॥ १५ ॥

श्रीं‍पदपूर्णमहामनुरूपे

श्रीशिवकाममहेश्वरहृद्ये ।

श्रीगुहवन्दितपादपयोजे

बालवपुर्धरदेवि नमस्ते ॥ १६ ॥

इति श्री बाला मानस पूजा स्तोत्रम् ।

sri bala manasa puja stotram